ANGKU KOCIEK  TAMPARUNGO

ANGKU KOCIEK  TAMPARUNGO

Oleh: Hamzah Afra Jonedi

(Mahasiswa Sastra Minangkabau Fib Unand)

            Tasabuik lah Nagari Tamparugo di Kacamatan Sumpur Kudus (Sumpu Kuduih), Banyaklah  kisah jo curito satantangan nagari nantun. Ikolah carito urang gaek nan lah manjadi angku di tanah nan suci tu. Angku pado maso dulu indaklah samo jo angku katiko maso kini. Indak makan nan jo minum dalam saminggu, kironyo angku lah kanyang dek ilmu nan inyo punyo.

            Katiko siang lah basalimuik nan jo paneh, katiko itu pulo urang-urang nagari Tamparungo bakarajo.  Bakarajo tujuah hari dalam sapakan, mambuwek wakatu sabulan indak taraso. Ikolah karajo nan acok disabuik dek urang sumpu jo“Manakiek”. Titiak paluah nan kalua hampai samo banyak jo titiak gatah nan kalua. Sarupo itulah karajo manakiek pado sungguahnyo.

            Sapanjang jalan tanah nan kariang dek indak mandapek aia hujan dari langik, sapanjang itu pulo lamo karajo urang Manakiek. Karano jalan tanah nan ado tu, batapi samak banyak, tapi di dalamnyo tumbuah batang gatah. Batang gatah nan manjadi sandaran iduik dek urang Tamparungo katiko dulu.

            Dulu jo kini banyak nan lah barubah. Tapi samantang pun bak itu, nan lamo tu ado pulo samonyo jo maso kini. Katiko dulu ado surau nan tadapek di Tamparungo nan dihuni dek surang angku. Angku ko lah nan manjadi imam sarato nan bapunyo akan surau tu. Angku nan acok di panggie dek urang dulu jo “Angku Kociek”.  Urang-urang Tamparungo dulu picayo, Angku Kociak ko iolah urang kiramaik nan tenggi ilmunyo. Sahinggo banyak urang Tamparungo minta pitunjuak jo barubek kapadonyo. Beko di tingganlah bareh jo piti agak saketek dek nan minta ubek guno jadi bantuak tarimo kasinyo

            Sado manusia di agie aka pikiran dek nan kuaso, tapi indak dalam bantuak Kharamah. Ikolah nan di punyo dek angku kaciak tu. Sahinggo makan jo minum lah taganti dek kharamah nan inyo punyo. Pado masonyo, pitih jo bareh nan di agie urang tu indaklah di pakai dek Angku tadi. Kharomah Angku Kociek nan lain, tasabuik dek rang sumpu, ado tujuah surau di Sijunjuang mangarajokan sambahyang Zuhur (Luhu : Bahaso Sumpu) di wakatu nan samo, di katujuah surau tu pulo angku kociek ko jadi imam di wakatu nan samo.

            Surau Angku Kociek ko talatak agak di bawah dari pado tanahnyo nan data. Sainggo dapek di katoan surau tu tagaknyo agak di dalam lakuak. Parnah kutiko tu, turunlah hujan nan sabana labek di daerah Sumpu Kuduih (Sumpur Kudur), dek urang-urangnyo lah salasai mangarajoan sambahyang  minta hujan tiko itu. titiak titiak nan turun jak di langik samakin banyak, batambah banyak. Sahinggo labeknyo hujan mambuwek Pamatang Sumpu (Sungai Sumpur) panuah, urang-urang di Sumpu menjadi sanang sampai lupo jo diri. Akhirnyo aia gadang pamatang sumpu mangamuak malando rumah urang.

            Indak kilek tapi barangin kancang, sahinggo aia gadang tu sampai ka batang aia dakek surau nyo Angku Kociek. Latak batang  aia tu jaleh labiah tinggi dari suraunyo angku, kok sabananyo lah bisa di katoan hilang atok surau tu dek aia nan mangamuak. Tapi, dek kharamah tuhan balaku pado walinyo, manyibak tangahlah aia nan gadang tu katiko lalu tapek di suraunyo Ungku Kociek tadi. Sahinggo nan tajadi, surau tu indak kanai dek aia gadang saketek alah nyo do.

            Indak ado angin indak ado hujan, siang nan rancak tu pai lah urang Tamparungo baduo mamak nan jo kamanakan untuak basobok jo angku kociak. Makasuik nan baduo tu iola untuak pai barubek, karano mamak dek kamanakan tu sadang sakik kaki. Panggielah kamanakan tu jo namo “Simok, namo kamanakan nyo tu, samantarao  itu mamaknyo banamo “Bandaro Basa”. Mamak kamanakan ko iolah urang Tamparungo yang tingga di tapi Tamparungo bana. Tapeknyo bateh antaro duo nagari, Puntian jo Tamparungo.

“Mak, Jauah surau angku kociek tu lai mak?” Simok Batanyo.

“Iyolah, agak jauah juo lai. Ba a tu? Lah Panek sajo ang?

“Iyo mak, lah dari tadi wak bajalan lai. Alun juo tibo-tibo lai.” Jawek Simok.

            Maso dahulu indak sarami rumah nan kini. Sahinggo batang kayu nan bamacam-macam banyak tadapek di sapanjang  jalan. Karano urang bisa lapa nio makan, Simok lah mulai jalan malambek sahinggo tacaliaklah dek nyo batang Polam. Buah Polom nan ado tu membuek Simok indak tahan untuak indak ma ambiek. Sahinggo patahlah rantiang di tapi jalan manjadi pa embek buah polom nan lah masuak maso tuo jo masaknyo.

“Mak tunggu sabanta, ambo embek polom tu lu mak. Ambo nio makan, untuang-untuang beko dapek nan lai masak.” Kecek Simok.

“Embeklah Mok. Embek duo. Mamak nio lo raso ee. Kaki ko agak sakik raso nyo. Tu baranti wak sabanta rancaknyo dulu. Beko makan Polom sajo wak lu.” Jawek Mamak nyo.

            Katiko awak ado usaho pasti ado hasilnyo. Ampek kali patah rantiang, ampek kali maembek jatuahlah duo buah Polom tu. Tapi sayang nan ciek jatuah ka dalam luluak nan ado tapi jalan tu. Akhirnyo cukuik ciek buah untuak baduo. Malang samo sifaitnyo jo mujua sapanjang hari. Kironyo nan di dapek bauh polom nan alun masak pulo.

Lah habih nan ado, nan indak lah nan ka dicari. Lanjuitlah kaduonyo ka surau angku Kociek tu. Akhirnyo, indak lamo sudah tu, sampailah kaduonyo di surau nan dicari tu. Kayu lamo jo atok nan lah barubah warna manandoan surau tu lah punyo umua salamo maso tagaknyo. Masuaklah kaduonyo tu untuak basobok jo angku kociek nan di cari.

Dek kharamah tuhan sabana balaku. Takajuik kaduonyo mandanga kato angku kociek tu. Indak di usia, indak di kasaan, indak pulo di berangan. Tapi angku tu langsuang mangecek:

“Nan jatuah ka dalam luluak tadi tu nan masak buah Polomnyo mah”.

Indak ado angin indak ado hujan, indak ado kijok indak ado suaro. Sabana takajuik lah mamak jo kamanakan nan baduo tu. Mandanga kato dari angku kociek. sarupo bayang-bayang nan ado dakek awak di tiok wakatu. Tantu dek inyo sado nan tajadi. Ikolah Angku Kociek nan di kana urang Tamparungo katiko dulu. Itulah kiramaik sarato kharomah nan lain dari Angko Kociek Tamparugo.